Nënkryetari i AAK-së që është edhe kryetar i Gjakovës, Ardian Gjini ka thënë se protestat nuk mund të cenojnë rendin kushtetues.

Gjini në RTV Dukagjini ka thënë se një vendim i tillë ishte i pritshëm pasi është në përputhje me Kushtetutën.

“Vetëvendosje nuk e deshi mandatarin që ia ofroi Presidenti. Nuk ka pasur rrugë tjetër”, tha ai, përcjell Telegrafi.

Ai thotë se ky vendim duhet të respektohet pasi është institucioni i instancës së fundit që respekton kushtetutën.

“Do ta kemi një qeveri. Nuk mund të them kohën se kur, por mund të them se njerëzit që do të jenë pjesë e asaj qeverie do të jenë në krye të detyrës”.

Gjini thotë se edhe në vendimin e vitit 2014 ka pasur reagime të shumta por thotë se në fund është pranuar.

“Ne e kemi pranuar pasi alfa e para e ndërtimit të shtetit është që të pranohen vendimet e gjykatave. Në këtë rast është në pyetje vendimi i Gjykatës Kushtetuese”.

Nënkryetari i AAK-së thotë se partitë mund të protestojnë por sipas tij formimi i qeverisë nuk mund të ndalet.

“Demokracia në Kosovë nuk mund të ndalet. As sundimi i ligjit nuk mund të ndalet. Po ashtu edhe krijimi i qeverisë nuk mund të ndalet. E drejta e protestës askujt nuk mund t’i ndalet në Kosovë”.

Gjini thotë se protestat nuk mund ta cenojnë rendin kushtetues.

“Vendimi është marrë nga instanca e fundit kushtetuese”, tha ndër të tjera Ardian Gjini.